Keçken künü Qırımda yedi hasta koronavirus yuqunçından vefat etti, dep aytıla Qırımnıñ Rusiye sağlıq nazirliginiñ er künlik monitoring malümatında. Qırımda bu hastalıqtan vefat etkenlerniñ sayısı 293 oldı.
«Ambulator tedaviylevde (covid) 2313 insan, hastahanede (covid ve pnevmoniya) 2528 kişi buluna, 73 insan observatorlarğa alındı. Umumen 15586 COVID-19 hastası qayd etildi. 11609 kişi tüzelgen soñ yiberildi», – dep aytıla haberde.
Keçken künü Qırımda 214 koronavirus hastası qayd etildi.
Noyabrniñ 30-nda saba Aqyarda 65 yañı COVID-19 hastası qayd etildi. Yılnıñ başından Aqyarda 4346 insan yañı koronavirus yuqunçına oğradı, 3789 kişi tüzeldi, 120 insan vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
