Qırımda keçken künü daa eki hasta koronavirus yuqunçından vefat etti. Bu aqta Qırımnıñ Rusiye sağlıq nazirliginiñ er künlik monitoring malümatında aytıla.
Bu malümatqa köre, Qırımda pandemiya vaqtında COVID-19-dan vefat etkenlerniñ sayısı 119 oldı.
«3576 insan tibbiy közetüv altında buluna, 1881-i evde dinamik közetüv altında qala, 1602 insan hastahanede buluna, 93 kişi observatorlarğa alındı», – dep haber etile müessise saytında.
Keçken künü Qırımda 205 koronavirus hastası qayd etildi, epidemiya vaqtında 7790 COVID-19 hastası qayd etildi. Aqyarda 1743 insan yañı koronavirus yuqunçına oğradı. 1148 insan tüzeldi, 53 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
