Qırımda koronavirus yuqunçı tasdıqlanğan daa dört kişi vefat etti. Bu aqta işğal etilgen yarımadanıñ Rusiye Sağlıq nazirliginiñ matbuat hızmeti bildirdi.
«…2757 insan (COVID-19) ambulator tedaviylevde buluna, 2436 kişi hastahanede (COVID-19 ve pnevmoniya) tedaviylene, 30 insan observatorlarğa alındı. Qırım Cumhuriyeti ve Aqyar şeerindeki Rospotrebnadşçor idaresi 12367 COVID-19 hastasını qayd etti. 7826 insan tüzelgen soñ hastahaneden çıqarıldı», – dep aytıla haberde.
Rusiye akimiyetiniñ malümatına köre, keçken künü Qırımda 161 yañı koronavirus hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı
