Qırımda soñki künde COVID-19 diagnozı tasdıqlanğan daa dört insan vefat etti. Bu aqta Qırımnıñ Rusiye sağlıq nazirligi bildire.
Umumen Qırımda koronavirustan vefat etken 66 insan qayd etildi.
Berilgen malümatqa köre, al-azırda 1619 insan hastahanelerde buluna (soñki künde 115 hasta alındı ve 117 hasta yiberildi).
761 COVID-19 hastası evde buluna, 126 insan observatorlarğa alındı. Umumen 2506 kişi tibbiy közetüv altında qala.
Rospotrebnadzor idaresi Qırımda pnevmoniya hastalarınıñ sayısı bir kereden arttı, dep bildirdi.
Keçken künü Qırımda 90 koronavirus hastası qayd etildi. Umumen Qırımda, akimiyetniñ malümatına köre, 4564 yañı koronavirus hastası qayd etildi, 105-i çetelden keldi, 128-i qomşu Rusiyeden kelgenler ve olarnen bağda olğanlar, 2808 insan tüzeldi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
