Qırımda Rusiye tahqiqatçıları «qanun talaplarını bozıp, missionerlik faaliyetini kerçekleştirgeninde» qabaatlanğan imam Ablâkim Galiyevge qarşı memuriy dava açıldı. Bu aqta «Qırım birdemligi» cemaat imayecisi Seytosman Karaliyevniñ malümatına esaslanıp bildire.
İmayeci, Rusiye quvetçileriniñ malümatına köre, «bozuv yeri» Sudaqnıñ Taraq Taş (Daçnoye) köyündeki cami ola, dep qayd etti.
Karaliyevniñ malümatına köre, Galiyev Rusiye quvetçilerine 2019 senesinden berli «İslâm dinine köre ad bere ve cenazelerni alıp bara», amma «Qırım musulmanları diniy idaresi ya da diger diniy teşkilâtnıñ azası» degil, dep bildirdi.
«Galiyev cuma namazını qıldırğanını inkâr etmedi, amma qanunsız missionerlik faaliyeti qabaatlarınen razı degil. O, memuriy bozuv protokolını imzaladı, çünki uquq normalarını bilmeyip, qabaatlanğan bozuv manasını añlamay edi. Qabaatsız olğanını isbatlamağa niyetlenemiz ve mında açıq siyasiy sebeplerni köremiz», – dep tarif etti Karaliyev.
«Qırım birdemligi» malümatına köre, 2019 senesi mart ayında içtimaiy ağlarda Qırımnıñ Rusiye müftisi Emirali Ablayevniñ «Krımenergo» baş müdiriniñ qullanıcı ile bağ muavinine yazğan muracaatı derc etildi. Anda Sudaqtaki caminiñ elektriklerini kesmek ricası bar edi, Qırım musulmanları diniy idaresi «bu camini qullanmay», dep aytıldı.
Ablayev ve Rusiye uquq qoruyıcıları imam Ablâkim Galiyevge qarşı açılğan memuriy davanı resmiy şekilde izaatlamadılar.
Martnıñ 2-nde Rusiye kontrolindeki Aqmescitniñ Mirovoy mahkemesi aqmescitli imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi.
Avgustnıñ 14-nde Rusiye kontrolindeki Aluşta şeer mahkemesi advokatlar Rustem Kâmilev ve «qanunsız missionerlik faaliyetinde» qabaatlanğan imam Yusuf Aşirovnıñ istinaf şikâyetlerini baqmadı. Aşirovğa 5 biñ ruble para cezası berildi.
«Qırım aq qorçalayıcı gruppasınıñ» eksperti Aleksandr Sedovnıñ qayd etkenine köre, Rusiye işğal altındaki Qırım yarımadasında diniy teşkilâtlarnı taqip ve ayırım areketlerini toqtatmaq talabına qulaq asmay.
