Qırımda keçken künü bir koronavirus hastası vefat etti. Bu aqta Qırımnıñ Rusiye sağlıq nazirligi bildire.
Böylece, COVID-19-dan vefat etkenlerniñ sayısı 69 oldı. 1811 hasta tedaviylene. 2533 insan tibbiy közetüv altında buluna, 713 kişi evde dinamik közetüv altında qayd etile.
1659 insan hastahanede, 161 kişi observatorlarda buluna.
Qırımda oktâbrniñ 2-nde 100 yañı koronavirus hastası qayd etildi.
Sentâbrniñ 30-nda Qırım ve Aqyardaki Rospotrebnadzor idaresi yarımadada koronavirus hastalarınıñ sayısı artqanı içün cemaat naqliyatında maska taquv qaidelerini sertleştirmege çağırdı. Müessise, aydavcılarnıñ maskasız çalışmasını yasaq etmege teklif etti.
Keçken künü Qırımda 98 koronavirus hastası qayd etildi. Umumen, yerli akimiyetniñ malümatına köre, Qırımda 4755 yañı koronavirus hastası qayd etildi. 2894 insan tüzeldi. 66 kişi koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
