Qırımda daa bir büyük seferberlik dalğası azırlana, dep bildirdiler Ukrayina Silâlı quvetleriniñ Baş ştabında.
"Vaqtınca işğal etilgen Qırım MC territoriyasında duşman daa bir seferberlik dalğasına azırlana. Yanvarniñ 29-nace bütün devlet ve hususiy müessiseler arbiy komissariatlarğa ordu hızmetinden serbest olğan şahıslarnıñ cedvellerini bermeliler. Nevbetteki seferberlik dalğası fevralniñ soñuna planlaştırılğan", - dep haber etile bildirmede.
Ukrayina arbiyleriniñ malümatına köre, fevralniñ 1-den Qırımnıñ bücet işhanelerinde ve müessiselerinde tamir ve qurucılıq işleri toqtatılacaq, ayırılğan paralar ise Ukrayinağa qarşı silâlı tecavuznıñ temin etilmesi içün yollanılacaq.
Rusiye akimiyeti bunı açıq izaatlamay, Qırım.Aqiqat malümatnı teşkere.
Yanvarniñ 23-nde Rusiye prezidentiniñ matbuat kâtibi Dmitriy Peskov, "qısmiy" seferberlik çerçivesinde vatandaşlarnıñ arbiy hızmetke celp etilmesi yekünlengenini, amma seferberlik aqqında bazı maddeler quvette qalğanını bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
