Qırımnıñ Qarasuvbazar rayonında Tana Suv özeni (Büyük Qarasuv özeniniñ sağ kirişi) qurudı, dep haber ete Qırım.Aqiqat mühbiri.
Yerli sakinlerniñ malümatına köre, sentâbrniñ ortasına qadar özende biraz suv bar edi, amma sentâbrniñ soñunda özen qurudı.
Qarasuvbazar rayonınıñ Bürçek (Kirpiçnoye) köyünde ayvanlarğa suv bergen ve yerli sakinler içün balıqçıqlıq yeri olğan tıynaq çoq yıl devamında ilk sefer qurup qaldı.
«Pek quru ve sıcaq sentâbr qalğan suv obyektlerini yoq ete. Bu ay tek Tana Suv özeni degil, avutımız da qurudı. Mında çoqtan yaşağanlar da böyle bir şey hatırlamay. Quyular da boşula. Qorqunç bir şey ola ve bizni qorquza. Suv meselesi bizni kün-künden daa çoq qasevetlendire», – dep tarif etti Qırım.Aqiqat mühbirine Bürçek köyüniñ sakini, adını telükesizlik maqsadınen aytmay.
Qırım Gidromettsentri malümatına köre, avgust ayında yarımadada suv anbarlarını toldurğan bir qaç özen qurudı. Alma, Qazıqlı Özen ve Belbek özenleri aqqında aytıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina akimiyeti işğal etilgen Qırımnıñ suv teminatı tek yarımada işğali bitken soñ yañıdan tiklenecek, dep bildirgen edi.
BM Ukraina monitoring missiyası da «Rusiye Qırımda insanlarnıñ suvğa irişüvinden mesüliyetli ola», dep israr ete.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
