Qırımda keçken künü beş hasta koronavirustan vefat etti, dep aytıla Qırım Sağlıq nazirliginiñ er künlik monitoring malümatında. Müessise malümatına köre, pandemiya başlağanından 129 insan COVID-19-dan vefat etti.
«2790 insan tibbiy közetüv altında buluna, 1290 kişi evde dinamik közetüv altında qala, 1412 kişi hastahanede buluna, 88 kişi observatorlarğa alındı», – dep aytıla haberde.
Qırım ve Aqyardaki Rospotrebnadzor idaresi koronavirus pandemiyası vaqtında vefat sayısına köre «eñ kritik» ay oktâbr oldı, dep bildirdi.
Keçken künü Qırımda 225 yañı koronavirus hastası qayd etildi. Umumen pandemiya başlağanından 9009 COVID-19 hastası qayd etildi. Qırımnıñ tibbiy müessiselerinde 3616 insan tedaviylene, 5160 kişi tüzelgen soñ çıqarıldı. Aqyarda yılnıñ başından 2164 kişi yañı koronavirus yuqunçına oğradı, 1371 insan tüzeldi, 61 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
