Qırımda bir künde daa beş COVID-19 hastası qayd etildi, dep bildire Qırımnıñ Rusiye yolbaşçısı Sergey Aksenov.
«Üç hasta epidemiologik tahqiqat ve laborator skriningi neticesinde qayd etildi, eki kişi hastahanege muracaat etti. Hastalar yuqunç hastahanelerine alındı», – dep aytıla haberde.
Umumen Qırımda 613 yañı koronavirus hastası qayd etildi. 36-sı çetelden keldi, 91-i qomşu Rusiyeden keldi, 458 hasta tibbiy yardım içün muracaat etkende ve hastalarnen alâqada olğanından qayd etildi, 28 hasta sağlam insanlarnıñ laborator skriningi neticesinde qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
