Keçken künü Qırımda 26 yañı koronavirus hastası qayd etildi. 10-u tibbiy yardım içün muracaat etkende qayd etildi, 14-ü daa evel hastalanğan insanlarnen alâqada oldı, 1-i sağlam insannıñ skriningi neticesinde qayd etildi, 1-i çetelden keldi, dep bildirdi Qırımnıñ Rusiye yolbaşçısı Sergey Aksenov.
Onıñ malümatına köre, umumen Qırımda 1038 yañı koronavirus hastası qayd etildi. 65-i çetelden keldi, 106-sı qomşu Rusiyeden kelgenler ve olarnen alâqada olğanlar. 792 insan yahşı oldı, 13 kişi koronavirustan vefat etti. Aqyarda 306 insan koronavirus yuqunçına oğradı, 244 insan tüzeldi, 6 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
