Qırımda Rusiye Tahqiqat komitetiniñ idaresi dağdan yuvarlanıp tüşken maşinanıñ içinde olğan qızçıqnıñ ölümi sebebinden «diqqatsızlıq neticesinde öldürüv» maddesi boyunca cinaiy iş açıldı. Bu aqta müessiseniñ matbuat hızmeti mayısnıñ 30-nda bildire.
«Tahqiqatnıñ ilk basamağında tahqiqatçılar qaza yerini baqıp çıqtı, tibbiy ve avtotehnik mahkeme ekspertizaları belgilendi, diger acele tahqiqat tedbirleri yapıldı. Tahqiqat devam ete, adise sebeplerini ögrenmek içün tahqiqat tedbirleri keçirile», – dep aytıla haberde.
Daa evel haber etilgeni kibi, Aqmescit rayonınıñ Mamaq (Stroganovka) köyünde Murun-Kir dağından yuvarlanıp tüşken maşinada qaldırılğan bala elâk oldı.
Tahqiqat malümatına köre, mayısnıñ 28-nde aqşam üstü aqay, apay ve 2014 senesi doğma küçük qızları VAZ-2121 maşinasınen Aqmescit rayonındaki Mamaq (Stroganovka) köyüne tabiatqa raatlanmağa ketti. Kelgende Murun-Kir dağına çıqtılar, manzaranı baqıp aşaycaq oldılar. Aşağanda bala ana-babasından ayırılıp, maşinağa mindi, maşina ise yuvarlanıp, captan tüşti.
Ana-baba maşinanı toqtatıp olamadı. Haber etilgenine köre, bala yaralanğanı içün can berdi.
