Qırımda Rusiye prezidenti Vladimir Putinniñ kelmesini bekleyler. O, noyabrniñ 23-nde Qırımda Rusiye regionlarınıñ reberlerinen Devlet şurası prezidiumınıñ keniş toplaşuvını keçirecek.
Putinniñ Qırım ziyareti aqqında Rusiye prezidentiniñ matbuat kâtibi Dmitriy Peskov jurnalistlerge haber etken edi. Onıñ aytqanına köre, toplaşuv Qırımnıñ cenübindeki Mriya Resort & SPA otelinde olacaq.
«Anda o, mayıs fermanında qayd etilgen vazifelerni yerine ketirüv meseleleri boyunca Devlet şurası prezidiumınıñ keniş toplaşuvını keçirecek», – dedi Peskov.
Kreml matbuat hızmetiniñ malümatına köre, toplaşuvda Rusiye regionları yolbaşçılarınıñ vazifeleri muzakere etilecek. Muşavere «Putinniñ Rusiye subyektleriniñ yolbaşçılarınen formal olmağan dialog formatında» keçirilecektir.
Soñki sefer Putinniñ işğal etilgen Qırım ziyareti aqqında avgustnıñ 4-nde haber etilgen edi, o, «Aqyardaki opera» festivaline barğan edi.
Ukraina Tış işler nazirligi, Rusiye Tış işler nazirligine Rusiye prezidentiniñ işğal etilgen Aqyarnı ziyaret etkeninen bağlı narazılıq bildirgen edi.
Qırımnıñ yalı boyundaki Mriya Resort & SPA oteli 2014 senesi sentâbrniñ 12-nde sanktsiyalarğa oğrağan Rusiyeniñ «Sberbankı» ile alâqaları bar olğanı içün ABD sanktsiyalar cedveline kirsetilgen edi.
