Qırımda COVID-19 ve keskin nefes virus yuqunçı hastalıqlarına oğrağanlarnıñ sayısı artqanı sebebinden daa altı mektepte dersler uzaqtan berilecek. Bunı Rusiye nezaretinde olğan Qırımnıñ Tasil nazirligi bildire.
"Altı mektepte dersler uzaqtan berilecek. Üç mektepte COVID-19 ve beş keskin nefes virus yuqunçı hastalıqları sebebinden. Uzaqtan dersler 147 sınıfta ve 78 tasil müessisende berile. Bir bala bağçası ve 73 mektepten evel gruppa qapatılğan (41 keskin nefes virus yuqunçı hastalıqları sebebinden)", - dep yazıla bildirmede.
Keçken afta koronavirus sebebinden 78 sınıfta dersler uzaqtan berilip başlandı.
Oktâbrniñ 12-nde Qırımda 531 yañı koronavirus hastası qayd etildi.
Hasta sayısı artqanı içün Qırım akimiyeti COVID-19 hastaları içün qoşma yerler açıla, dep bildirdi.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
