Qırımda yañı koronavirus hastalarınıñ sayısı bir afta içinde tahminen 40% arttı. Bunı Qırım boyunca Rospotrebnadzor idaresiniñ reber muavini Dmitriy Krutikov bildirdi.
«Soñki afta içinde 1 189 yañı koronavirus hastası qayd etildi, bu bundan evelki aftağa baqqanda 38.6% ziyadedir. Bu afta cumhuriyetniñ yedi bölgesinde yañı koronavirusnen hastalanma artması qayd etile: Yaltada, Aluştada, Aqmescitte, Sudaqta, Canköy, Bağçasaray ve İçki rayonlarında», – «Krıminform» Krutikovnıñ aytqanlarından alıntı ketire.
İyünniñ 22-nde Qırımda 210 yañı koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.