Qırımda üç künden berli koronavirus hastalarınıñ sayısında rekord qayd etile. Oktâbrniñ 5-i sabası itibarınen 441 COVID-19 hastası qayd etildi, tünevin olğan raqam 6 kişi çoq edi. Bunı Qırımnıñ Rusiye sağlıq nazirligi haber ete.
Qırımda bir künde 15 kişi koronavirustan vefat etti, bir kün evelsi 4 insan vefat etti.
«Umumen (pandemiya vaqtında – QA) 81 363 COVID-19 hastası qayd etildi. Bir künde 505 insan tüzeldi, bütün müddet devamında 69542 kişi yahşı oldı, pandemiya vaqtında 2630 hasta öldi», – dep aytıla müessise haberinde.
Hatırlatamız, keçenlerde 435 hasta aqqında haber etilgen edi.
Qırımda sentâbrden başlap koronavirus hastalarınıñ sayısı arta. Yerli Rospotrebnadzor idaresi dördünci koronavirus dalğası olacaq, faqat qırımlılar daa az aşı ola, dep bildirdi.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Yarımadada bir sıra sıñırlav qala.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
