Keçken künü Qırımda 11 yañı koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov.
Onıñ malümatına köre, beş hasta tibbiy yardım içün muracaat etkende qayd etildi, bir kişi qomşu Rusiyeden keldi, eki hasta daa evel hastalanğanlarnen alâqada olğan edi, 3 hasta sağlam insanlarnıñ skriningi neticesinde belli oldı, bir hasta çetelden keldi, angi memleketten kelgeni aytılmay.
Yerli akimiyetniñ malümatına köre, umumen 994 yañı koronavirus hastası qayd etildi. 64-ü çetelden keldi, 106-sı qomşu Rusiyeden kelgenler ve olarnen alâqada olğanlar. 734 insan yahşı oldı, 13 kişi koronavirustan vefat etti. Aqyarda 305 insan koronavirus yuqunçına oğradı, 239 insan tüzeldi, 6 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
