Qırımda daa evel yañı koronavirus yuqunçı diagnozı tasdıqlanğan ilk hastalar hastahaneden çıqarıldı. Bu aqta Rusiye kontrolindeki Qırım Sağlıq nazirligi bildire.
«Olarğa kerekli tibbiy yardım kösterildi. Koronavirus tedqiqi tekrar yapılıp menfiy netice alınğan soñ insanlar hastahaneden çıqarıldı», – dep ayttı müessise yolbaşçısı İgor Çemodanov.
Onıñ malümatına köre, hastalardan biri «Kezlev şeer hastahanesinden», ekincisi «Saq rayon hastahanesinden» çıqarıldı.
Aprelniñ 3-nde işğal etilgen Qırımda çetelden kelgen 2998 insan tibbiy közetüv altında buluna, olardan 2915-i evde dinamik közetüvde, 68-i hastahanede, 15-i observatorlarda buluna. Rospotrebnadzor malümatına köre, cuma kününe qadar 18 COVID-19 hastası qayd etildi. Aqyarda – 5 koronavirus hastası.
Daa evel berilgen malümatqa köre, Qırımda koronavirusnen hastalanğan yerli sakinge qarşı özüni tecrit etüv rejimini bozğanı içün ilk cinaiy dava açıldı.
İmaye tarafı koronavirusqa oğrağan Qırım sakininiñ qabaatını inkâr ete.
Qırımda aprelniñ 3-nden 6-na qadar acele bir şey olmasa, evden çıqmağa yasaq etildi. Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
