Qırımda vefat etken koronavirus hastalarınıñ sayısı 16 oldı. Bu aqta iyünniñ 12-nde derc etilgen Qırımnıñ Rusiye Sağlıq nazirliginiñ er künlik monitoringi bildire.
Müessise statistikasına köre, 119 insan tedaviylenmege devam ete. 357 insan tüzeldi, 16 kişi vefat etti, 7-si COVID-19 sebebinden can berdi, dep qayd ete müessise.
2907 insan tibbiy közetüv altında buluna, 932 kişi observatorlarğa alındı.
Keçken künü işğal etilgen Qırımda yedi yañı koronavirus hastası qayd etildi. Soñki sefer COVID-19 hastasınıñ vefatı aqqında Qırımda iyünniñ 10-nda haber etilgen edi.
Akimiyetniñ malümatına köre, Qırımda 490 koronavirus hastası qayd etildi, 33-ü çetelden keldi, 87-si qomşu Rusiyeden kelgenler ve olarnen alâqada olğanlardır. 16 COVID-19 hastası vefat etti. Aqyarda 178 insan hastalandı. 151 kişi tüzeldi, 3 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
