Qırımnıñ rusiyeli akimiyeti, yañı koronavirus infektsiyasına qarşı rusiye vaktsinasınıñ ilk partiyası artıq yarımadağa ketirilgenini bildire, birinciden ekimler aşılanacaq, dep ayttı cumaertesi künü Qırım Sağlıq naziri müavini Anton Lâsovskiy jurnalistlerge.
"Bugünde-bugün Qırım Cumhuriyetine birinci deñev partiyası ketirildi, 42 doza. İlk-evelâ covid hastahanelerinde çalışqan ekimler aşılanacaq, ekinci sırada - halqnen eñ çoq çalışqan müessiseleriniñ hadimleri. Soñra, ondan soñ, yarımadada dozalarnıñ sayısı artqanınen, ealiniñ aşılamasına keçecekmiz", - yaza Lâsovskiyniñ sözlerinden TASS.
Onıñ aytqanına köre, şimdi 3 biñ dozağa ihtiyac bar, sözde olar sentâbrniñ soñunace alınmaq kerek.
Tünevin Qırım Cumhuriyetinde 78 koronavirus adisesi tasdıqlandı. Aqyarda ise 20 yañı COVID-19 hastası qayd etildi.
Umumen Qırımda, akimiyetniñ malümatına köre, 3 494 yañı koronavirus hastası qayd etildi, 94-ü çetelden keldi, 124-ü qomşu Rusiyeden kelgenler ve olarnen alâqada olğanlar.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
