Qırımnıñ cenübiy sailindeki eñ uzun Suvuq-Suv özeniniñ suvu o qadar azlaştı ki, evelleri olğanı kibi deñizge artıq qoşulmay. Bunı, Sudaqta özen ağzını ziyaret etken kişi Qırım.Aqiqat mühbirine aytıp berdi.
Yerli sakinlerniñ aytıp bergenine köre, yanvar ayında tüşken yağanaqlar bile Suvuq-Suv özenindeki suv seviyesini arttırmağan.
“Qurğaq yazından soñ özende suv azlaşqanı ola edi, amma qışta mına böyle acınıqlı alda olmasını hatırlamayım. Yanvar ayında Sudaqta yağanaqlar bayağı oldı”, – aytıp berdi Qırım.Aqiqat mühbirine yerli ülkeşınas.
Suvuq-Suv özeniniñ uzunlığı – 22 km, özenge bir çoq irmaq qoşula. Özenniñ ağzı Sudaqtaki Alçaq burnu etegindedir.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
