Seyitler rayonınıñ Seyitler Vaqıf (Razlivı) köyünde avgustnıñ 31-nde tutulğan faal ve cemaat jurnalisti Ayder Kadırov içün dua yapıldı. Oña qarşı cinaiy iş açıldı, bir yerge ketmemeli.
«Qırım birdemligi» bildirgenine köre, yaqın qasabalardan kelgenler, qomşu, soy-sop, diger rayonlardan kelgen 200-den çoq insan Kadırovlar qorantası ile birdemligini bildirmek içün keldi. İnsanlar bütün qırımlı siyasiy mabüslerniñ azat etilmesi içün dua etti.
Ayder Kadırovnıñ babası Ahmacon Kadırov kelgenlerge böyle sözlernen hitap etti: «Bütün halq bir çoq belâ ve büyük telükeler qarşısında qaldı, amma beraber olsaq, bir-birimizge böyle qol tutsaq ve Allahqa inansaq, Onıñ yardımına inansaq, telükesizliktemiz».
Ayder Kadırov mahkeme psiholog-psihiatrik ekspertizasından vazgeçti.
Avgustnıñ 31-nde Rusiye quvetçileri tarafından tutulğan dört qırımtatar faali ketmemek şartınen yiberildi.
Faallerge qarşı «çaqmama» maddesine istinaden (Rusiye Ceza kodeksiniñ 205.6 maddesi) cinaiy dava açıldı. FSB tahqiqatçısı Valeriy Şerstükovnıñ bildirgenine köre, tutulğanlar 2015 senesi «Vkontakte» içtimaiy ağında, FSB bildirgenine köre, Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken Umicon Dadajonov ile yazışqan edi.
Uquq qoruyıcılar tünevin keçirilgen tintüvler, tutulğan faaller, qırımtatarlarğa qarşı yapılacaq areketlerni açıq sürette izaatlamay.
Avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi. Onıñ aytqanına köre, Ayder Kadırov 4 balanıñ babası ola, büyük balasınıñ balalıqtan berli saqatlığı bar, er adamınıñ özü şeker hastasıdır. «Qırım birdemliginiñ» malümatına köre, Rusiye quvetçileri dördüni de Aqmescitke FSB idaresine alıp ketti. Faallerniñ advokatları bildirgenine köre, olarnı FSB binasına kirsetmegen ediler.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
