Çeçek ayınıñ 14-nde gece Qırımda dronlarnıñ uçması, atış ve patlav sesleri eşitildi, dep haber etile Qırım telegram kanallarında. Rusiye Mudafaa nazirligi Qırım yarımadasına uçucısızlar ücüm etkenini bildirdi.
"Krımskiy veter" telegram kanalınıñ öz abunecilerine atıfta bulunğan malümatına köre, Aqmescit rayonında ve Aqmescitniñ özünde pulemet atışları ve patlavlar eşitildi. "Sarabuz" rus arbiy uçaq alanı ve neft bazası, Tavriya TES yanında patlavlar aqqında haber etildi. Bundan ğayrı, ava mudafaası ve patlavlar Keriç, Kefe ve Cenübiy Ukrayinağa tarqalğan.
Rusiye Mudafaa nazirligi çeçek ayınıñ 14-nde saba Rusiye arbiyleri Rusiyeniñ çeşit regionları, işğal etilgen Qırım ve Azaq deñiziniñ üzerinde 97 dron urulıp tüşürilgeni aqqında esabat berdi. Qırımda uçaqlarnıñ sayısı daa belli degil. Ne qadar dron tüşürilmedi, idarede bildirmediler. Berilgen malümatqa dair iç bir delil kösterilmedi.
Rusiyeniñ büyük istilâsı başlağan soñ Rusiyede ve işğal etken topraqlarında çeşit obyektler ava ücümlerine oğray. Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.