Qırımda büdjet hadimlerini mart 15-17 künleri keçirilecek qanunsız Rusiye prezidenti saylavlarına barmağa mecbur eteler, dep bildire ''Suspilne'' yarımadanıñ tasil saası hadimlerinden birine atıf etip.
''Bizge, iş yerinde problemler olmasın dep, saylavlarğa barmaq ve rey bermek kerek, dep aytıla. Rey berüvden soñ, oquv yurtunıñ müdirine telefon etip, rey bergenimizni bildirmek kerekmiz. Bizge belli bir adamğa rey bermek kerek olğanını aytmaylar. Esas mesele, insanlar saylavğa barmağa istemeyler, saylavğa kelüvni köstermektir'', – dep bildirdi o.
"Sarı şerit" areketiniñ faalleri de saylavğa kelüvniñ azlığı aqqında yazalar.
Martnıñ 15-nde Rusiyede prezident saylavlarında rey berüvniñ birinci künü. Birinci kere o, üç kün devam etecek - martnıñ 15-nden başlap, bazar künü, martnıñ 17-ne, saylavlarnıñ esas kününe qadar.
Saylav bölükleri Ukrayinanıñ işğal etilgen topraqlarında Zaporojjâ, Herson, Donetsk ve Lugansk vilâyetleriniñ Rusiye nezaretindeki topraqlarında, em de işğal etilgen Qırımda açıldı. Ukrayina ve Ğarp, ilhaq etilgen ukrayin topraqlarında keçirilgen qanunsız saylavlar halqara uquqnı boza ve neticeleri tanılmaycaq, dep bildireler.
Ukrayina Rusiye prezidenti saylavlarını tanımaycaq, çünki memlekette "saylavlar artıq çoqtan yoq", dep bildirdi Ukrayina milliy havfsızlıq ve mudafaa şurasınıñ kâtibi Oleksiy Danılov Azatlıq Radiosına bergen izaatında.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
