Qırımda Aqmescit (Simferopol) rayonınıñ Sumskoye köyünde boğday tarlası yanıp başladı, dep bildire Rusiye FVN-niñ Qırım idaresi.
"Yel şiddetli olğanı içün, ateş qısqa vaqıtta tarqalıp, 200 gektardan çoq boğdaynı yaqmaq mümkün edi. Amma Qırım yanğıncıları ve operativ-menevr taqımları, tez ve birlikte yapılğan areketleri içün, ateşni toqtatıp oldılar ve 100 gektardan çoq boğdaynı qurtardılar", - denile beyanatta.
Yanğınnı bir saatta bütünley söndürdiler, dep qayd etile. Yanğında yaralanğanlar ve elâk olğanlar olmadı. Ekspertler yanğın sebeplerini bilmege tırışa.
Tünevin Aqyarda Üç Quyu qasabasınıñ yanında lavanda tarlası yandı. Müessiseniñ malümatına köre, yel sebebinden ateş tez tarqaldı, söndürilgende onıñ alanı 800 metr kâre oldı.
Bundan evel İçki rayonınıñ Mamat Şaqul (Markovo) köyünde boğday tarlası yandı.
Daa evel Kefe civarında orman yanğınını tahminen doquz saat devamında söndürdiler.
