Bağçasaray rayonınıñ Zalanköy (Holmovka) köyü yanında 2018 senesi avgustnıñ 6-nda ğayıp olğan qırımtatarı Eynar Eyupovnıñ cesedi tapıldı. Bu aqta Qırımtatar Milliy Meclisiniñ reisi Refat Çubarov Facebook saifesinde yazdı.
«Bir yıldan berli ondan haber yoq edi. Cenaze yarın, sentâbrniñ 17-nde, qılınacaq», – dep qayd etti Çubarov.
Qırımtatar faali Seydamet Mustafayevniñ aytqanına köre, Eynarnı «Bağçasaray raonında Zalesnoye köyüniñ rayonında ormanda eçkilerni otlatqan qadın taptı», tek urba ve bazı kemiklerniñ qalıntıları bar edi.
2018 senesi avgust ayında haber etilgenine köre, Bağçasaray rayonınıñ Büyük Qaralez (Krasnıy mak) köyünde 1998 senesi doğğan qırımlı Eynar Şevketoviç Eyupov ğayıp oldı.
Yarımadanıñ Rusiye uquq qoruyıcı organlarınıñ vaziyetke dair izaatları şimdilik yoq.
