2025 senesinde, Qırımdbir ukrayin mektebi bile qalmadı. Bundan da ğayrı, ilhaqtan evel olarnıñ sayısı 15 olsa da, şimdi yarımadada qırımtatar tilinde dersleri berilgen tek yedi mektep qaldı, dep haber ete Qırımtatar resurs merkezi.
Aq qorçalayıcılarnıñ qayd etkenine köre, Rusiyeniñ Qırım Tasil nazirliginiñ malümatna köre, 2023/2024 oquv yılında yarımadada ukrayin tilini tek 249 talebe ögrengen — bu yarımadadaki umumiy mektep talebeleriniñ 0,015%-ni teşkil ete. Teñeştirmek içün, 2014 senesi Qırımda ukrayin tili ve edebiyatını 13 biñden ziyade bala ögrene edi.
"2025 senesinde işğal etilgen Qırımda ukrayin tilinde ders bergen bir mektep bile qalmadı. Ukrayin tilinde oqutqan sınıflarnıñ çoqusı rus işğalcileri tarafından lâğu etildi. Ana-babalarnıñ basımı altında balalar ukrayin tilinde oquvdan vazgeçmege mecbur ola, ocalar işten çıqarıla, derslikler musadere etile, ukrayin medeniyetini ve tasilini desteklemek içün yapılğan er bir areketni taqip eteler. Aynı vaqıtta, işğalci «akimiyet» balalar «ana-babalarınıñ ricasınen» oqutılğanını iddia ete, amma asılında öyle şaraitler yaratıla ki, ukrayin tiliniñ faydasına seçim yapmaq mümkün degil", — dep, qayd etile beyanatta.
Qırımtatar Resurs Merkezinde qayd etilgeni kibi, qırımtatar tili ile bağlı vaziyet bayağı qıyın. Hususan, onıñ ğayıp olma telükesi altında olğanını köz ögüne alsaq.
"İşğalden evel Qırımda qırımtatar tilinde 15 mektep ve 384 sınıf bar edi. Aqmescitte 16-ncı yañı mektep açılğanına baqmadan, işğal akimiyeti soñundan mekteplerniñ statusını deñiştirdi. Böyleliknen, işğalci akimiyetniñ malümatına köre, oqutuv qırımtatar tilinde 7, rus ve qırımtatar tillerinde oqutılğan 3 mektep bar, 6 mektep ise "umumtasil" mektepleri statusını aldı. Oqutuv qırımtatar tilinde alıp barılğan 384 sınıftan 119 sınıf qaldı", — dep, haber etti Qırımtatar merkezi.
Qırımtatar tilinde oquv tek 9-ıncı sınıfqace ve ana-babanıñ ricasınen mümkündir. Oquv yurtlarınıñ idareleri böyle arizalar olmasın dep, manialar yarata, dep qayd eteler QRM-nde.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
