Oraqnıñ 30-na keçer gecesi Rusiye tarafından işğal etilgen Qırımda patlavlar, uçaqquvar artilleriyasınıñ işi ve pilotsız uçaqlarnıñ uçuşı eşitildi, dep bildire Qırımnıñ telegram kanalları yerli sakinlerniñ haberlerine atıf eterek.
Aqmescit rayonınıñ Sarabuz qasabasında, anda Rusiye arbiy aerodromı yerleşe, sakinler uçaqlarnıñ uçqanını ve ateş açılğanını qayd ettiler. Yerli neşirlerniñ abunecilerine köre, yerli garnizon yanına kelip tüşken.
"Krımskiy veter"niñ malümatına köre, gece saat birlerde Aqmescit rayonınıñ Nikolayevka köyü civarında qısqa aralarnen üç küçlü patlav olğan, soñra uçaqquvar silâsından ateş açılğan.
Bundan da ğayrı, Sovet rayonınıñ sakinleri saat 02:28 civarında uçucısız uçaqlarnıñ kütleviy şekilde uçqanı aqqında bildirdi, 03:15 civarında ise Kefede patlav eşitilgen. Qırım yarımadasında ava telükesi ilân etilmedi.
Oraqnıñ 30-nda saba RF Mudafaa nazirligi, keçken gece ava mudafaasınıñ nevbetçi quvetleri tarafından Rusiyeniñ 9 regionı ve işğal etilgen Qırım, Azaq ve Qara deñizleri üzerinde 258 Ukrayin uçucısız uçağı yaqalandı ve yoq etildi, dep bildirdi. Rusiye müessisesi Qırım üzerinde ne qadar dron tüşürilgenini aytmadı.
2022 senesi Armandan başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.