Qırımda Keriç boğazında neft tankerleriniñ qazasından soñ bir künde 15 tonna mazut ile kirlengen qum ve topraq toplandı. Bu aqta yanvarniñ 30-nda saba Rusiye Fevqulâde vaziyetler nazirliginiñ matbuat hızmeti bildirdi.
"Qırımda Keriçten Aq Şeyh rayonınıñ Portovoye qasabasına qadar yalı boyu 525 kilometrden ziyade tedqiq etile. Bundan da ğayrı, nezaret etmek içün pilotsız uçaqlar ve deñiz gemileri qullanıla. 197 kilometrlik yalı temizlendi, bir künde 5 kilometrge yaqın. Umumen 578 tonnadan ziyade kirli qum ve topraq toplandı, bir künde 15 tonna; 563 tonna çıqarıldı", — dep aytıla müessiseniñ haberinde.
Keçken künü Rusiye Fevqulâde vaziyetler nazirligi Qırımda 31 tonna toplanğan qum ve mazutnen kirlengen topraq aqqında bildirgen edi.
Bundan evel Rusiye baş nazir muavini Vitaliy Savelyev, Keriç boğazında elâk olğan "Volgoneft-239" tankerinden mazutnıñ çıqarılması bütünley yekünlendi, dep bildirdi. Onıñ aytqanına köre, geminiñ tanklarından 1,4 biñ tonnadan ziyade mazut sızdırıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
