Keçken künü Qırımda 604 koronavirus hastası qayd etildi, tünevin hasta sayısı daa az edi ve bu raqam pandemiya vaqtında Qırımda bir künde qayd etilgen eñ büyük raqam oldı.
Bu aqta Qırımnıñ Rusiye sağlıq nazirligi bildire. Müessise malümatına köre, bir künde 17 hasta koronavirustan vefat etti, pandemiya vaqtında ise 2806 kişi vefat etti.
«Umumen (pandemiya vaqtında – QA) 88 847 COVID-19 hastası qayd etildi. Bir künde 543 insan tüzeldi, bütün müddet devamında 74 592 kişi yahşı oldı», – dep aytıla Qırım nazirliginiñ malümatında.
Oktâbrniñ 14-nde Rusiye kontrolindeki Qırım baş nazir muaivni, emek ve içtimaiy qoruv naziri Yelena Romanovskaya yarımada hastahanelerinde koronavirus hastaları içün yerlerniñ 88%-ı tolu, dep bildirdi.
Rusiye kontrolindeki Qırım ükümetiniñ reisi Yuriy Gotsanük Qırımda aşı olğan sakinler içün QR-kod sistemasınıñ kirsetile bile, Qırım yarımadasında tam qapanuv olacağını «şimdilik beklemeñiz», dep ayttı.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
