Qırımda Rusiye politsiyası Muniver Kelâmovağa qarşı açılğan memuriy davanı mahkemege berdi.
«Qırım birdemligi» bildirgenine köre, 13 yılğa üküm etilgen «Hizb ut-Tahrir davasınıñ» mabüsi Edem Smailovğa soy olğan Kelâmova bir kişilik narazılıq aktsiyası içün mesüliyetke çekile. Bu areketini politsiya Qırımnıñ Rusiye yolbaşçısı Sergey Aksenov 2020 senesi martnıñ 17-nde çıqarğan «Qırım Cumhuriyetinde yüksek seviyeli azırlıq rejimi» buyruğını bozğan açıq tedbir olaraq qabul ete.
Advokat Lilâ Gemeciniñ aytqanına köre, bu memuriy dava malümatı hatalarnen tizilgen.
«Memuriy dava açmaq qararı başqa insanğa qarşı alındı – Kelemova (qadınnıñ soyadı Kelâmova – QA) dep yazılğan. Yani bir qaç vesiqada soyadı farqlı. Memuriy protokol tizilgende aqları da bozuldı. Terciman kerekmi yoqmı soramadılar, aq ve vazifeleri añlatılmadı, şaatlar davet etilmedi. Protokol endi tizilip başlağan soñ şaatlar çağırıldı. Bu şaatlarğa da yanımızda aq ve vazifeleri añlatılmadı. Bütün bularnı protokolğa ilâve etilgen ayrı kâğıtta qayd ettik», – dep izaatlay advokat Gemeci.
Muniver Kelâmova mektüp aldı, anda kiyevine qol tutmaq maqsadınen keçirgen bir kişilik narazılıq aktsiyası sebebinden oña qarşı memuriy tahqiqat başlatıldı, dep aytıla.
Rusiye uquq qoruyıcıları Kelâmovanıñ davasını açıq sürette izaatlamay.
Edem Smailovnıñ soyu sentâbrniñ 16-nda Aqmescit rayonınıñ Qulçuq (Rodnikovoye) köyünde bir kişilik aktsiyasına çıqtı.
Bundan bir kün ögüne «Qırım birdemligi» koordinatorlarından biri, Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ anası Venera Mustafayeva Bağçasaray merkezinde bir kişilik narazılıq aktsiyasını keçirdi.
Qırımdaki Rusiye İç işler nazirligi Venera Mustafayevağa qarşı eki memuriy dava açtı – Rusiye Memuriy cinayetler kodeksiniñ 20.6.1 maddesine istinaden (Fevqulâde vaziyet ola bilecek yerde yüksek seviyeli azırlıq rejimi alda qaidelerge riayet etmeme) ve Rusiye Memuriy cinayetler kodeksiniñ 20.2.2 maddesine istinaden (Açıq tedbir keçirilecegine dair haber etmeyip, açıq tedbirni teşkil etüv ya da ötkerüv).
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
Ukraina prezidenti Volodımır Zelenskıynıñ temsilciligi Bağçasaraydaki ekinci «Hizb ut-Tahrir davasınıñ» ükmüni «arbiy cinayet» dep adlandırdı. Reintegratsiya nazirligi, qırımtatarlarğa qarşı çıqarılğan üküm sebebinden Rusiyege qarşı sanktsiyalarnı sertleştirmege talap etecek, dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
