Qırım ve Aqyardaki Rospotrebnadzor idaresiniñ yolbaşçısı Natalya Penkovskaya, tünevin observatorlarğa 18 adam yollanılğanını bildirdi. Bu aqta o mayısnıñ 7-sinde COVID-19 ile küreş operativ ştabı toplaşuvında haber etti.
"Tünevin Kezlev demiryol vokzalından sekiz adam, Aqmescit vokzalından bir adam, ava limanından - altı adam ve maşna keçit noqtalarından üç adam observatorlarğa yollanıldı. Umumen bir künde 18 adam oldı", - dedi Qırım Rospotrebnadzor idaresiniñ yolbaşçısı
Bundan ğayrı, o, Qırımda Tel-Avivden adamlarnıñ kelgenine azırlanğanlarını bildirdi.
"Bundan evel çetelden kelgen gruppalarğa köre, bu sefer çoq adam olmaycaq. Olarnı da observatorlağa yerleştirecekmiz", - dedi Penkovskaya.
Böylece, al-azırda Qırımda 168 yañı koronavirus hastası qayd etildi. 22-si çetelden keldi, 17-si – Rusiyeden. 22 hastanıñ Rusiyeden kelgenlernen alâqası oldı, 106 kişi laboratoriyada tasdıqlanğan hastalarnen alâqada olğan edi. 41 kişi tüzeldi. Bir hasta vefat etti. Aqyarda 106 COVID-19 hastası bar, eki insan vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren maska rejimini kirsetmege azır. Daa evel Qırımda yüksek seviyeli azırlıq rejimi mayısnıñ 11-ne qadar uzatılğan edi, Aqyarda onı mayısnıñ 30-na qadar uzatqanlar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
