Qırımda keçken künü COVID-19-dan vefat etken yedi insan qayd etildi. Pandemiya devamında 767 kişi vefat etti, dep haber ete Qırımnıñ Rusiye sağlıq nazirligi.
Müessise malümatına köre, 3895 insan (COVID) ambulator tedaviylevde, 2212 kişi (COVID ve pnevmoniya) hastahanelerde buluna, observatorlarğa alınğanlar yoq. Umumen epidemiya başlağanından 32543 COVID-19 hastası qayd etildi. Tüzelgen 26803 kişi yiberildi.
Keçken künü Qırımda 156 yañı koronavirus hastası qayd etildi.
Aqyarda fevralniñ 1-nde saba 101 yañı COVID-19 hastası qayd etildi. Pandemiya vaqtında Aqyarda 9805 kişi yañı koronavirus yuqunçına oğradı. 8739 insan yahşı oldı, 397 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
