Qırımda iyünniñ 7-nde sekiz yañı koronavirus hastası qayd etildi. Bu aqta Qırımnıñ Rusiye yolbaşçısı Sergey Aksenov bildirdi.
Onıñ aytqanına köre, sekiz hastadan ekisi epidemiologik tahqiqat ve laborator skriningi neticesinde qayd etildi, altısı – tibbiy yardım içün muracaat etkende. Hastalar yuqunç hastahanelerine alındı.
İyünniñ 8-i sabasına qadar Qırımda 446 koronavirus hastası qayd etildi. 33-ü "çetelden ketirildi", 78 hasta qomşu Rusiyeniñ subyektlerinden kelgenler ve olarnen alâqada olğanlar, 318 hasta tibbiy yardım içün muracaat etkende ve hastalarnen alâqada olğanı içün qayd etildi, 17 sağlam şahıs laborator skriningi neticesinde qayd etildi. 317 insan tüzelip yahşı oldı.
Daa evel Qırımda iyünniñ 6-nda 14 yañı COVID-19 hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
