İlhaq etilgen Qırımda koronavirustan eki adam vefat etti. Bunı avgust 16-ı içün rusiyeli Qırım Sağlıq Nazirliginiñ statistika malümatı köstere.
Böylece, Qırımda COVID-19-dan ölgenlerniñ sayısı 23 adam oldı.
"Tibbiy baqıluv altında 1076 adam bar, olardan 12 adam evlerinde baqıla, 805-i - hastahanelerde, 259-ı - observatorlarda. Tibbiy müessiselerde 527 adam tedaviylene, 1245 adam yahşı olıp hastahaneden çıqtı", - denile beyanatta.
Umumen Qırımda, yerli akimiyetniñ malümatına köre, 1820 yañı koronavirus hastası qayd etildi. 83-ü çetelden keldi, 114-ü qomşu Rusiyeden kelgenler ve olarnen alâqada olğanlar. 1245 kişi tüzeldi, 21 hasta koronavirustan vefat etti. Aqyarda yılnıñ başından 427 insan yañı koronavirus yuqunçına oğradı, 331 insan tüzeldi, 12 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
