Keçken künü Qırımda daa bir koronavirus hastası vefat etti, pandemiya vaqtında 142 insan COVID-19-dan vefat etti. Bu aqta Qırımnıñ Rusiye sağlıq nazirligi bildire.
Müessise malümatına köre, 2859 insan tibbiy közetüv altında buluna, 1183 kişi evde dinamik közetüv altında qala, 1546 insan hastahanede buluna, 134 kişi observatorlarda qala.
Keçken künü Qırımda 161 koronavirus hastası qayd etildi. Umumen Qırımda epidemiya vaqtında 9816 COVID-19 hastası qayd etildi, 5469 insan tüzeldi.
Qırımda, Rospotrebnadzor tahminlerine köre, koronavirus hastalarınıñ eñ yüksek seviyesi 2021 senesi yanvar ayında olıp, eñ az fevral ayına qadar devam etecek.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
