Keçken künü Qırımda altı hasta koronavirus yuqunçından vefat etti. Bu aqta Qırımnıñ Rusiye sağlıq nazirliginiñ er künlik monitoring malümatında aytıla. Bu malümatqa köre, Qırımda pandemiya vaqtında 258 kişi COVID-19-dan vefat etti.
«2426 insan ambulator tedaviylevde (covid), 2321 kişi hastahanede (covid ve pnevmoniya) buluna, 11 İnsan observatorlarğa alındı. 14237 COVID-19 hastası qayd etildi. 10212 insan tüzelgen soñ yiberildi», – dep aytıla müessise malümatında.
Rospotrebnadzor, noyabr ayında yarımadada koronavirus yuqunçından vefat etkenlerniñ sayısı artmağa devam ete, dep bildirdi. Keçken künü Qırımda 225 COVID-19 hastası qayd etildi.
Qırım akimiyeti COVID-19 hastalarınıñ sayısı dekabrniñ ortasında pek artacaq, dep bekley.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
