Keçken künü Qırımda 91 koronavirus hastası qayd etildi, sekiziniñ hastalıq alâmetleri yoq. Bu aqta Qırımnıñ Rusiye yolbaşçısı Sergey Aksenov Facebook saifesinde bildirdi.
«69 hasta tibbiy yardım içün muracaat etkende qayd etildi, 21 kişi daa evel qayd etilgen hastalarnen alâqada oldı, bir hasta çetelden keldi», – dep aytıla haberde.
Aksenovnıñ malümatına köre, bir künde yañı koronavirus yuqunçını tedqiq etken yarımada laboratoriyaları 4295 insannı teşkerdi.
«Bir künde tüzelgenlerniñ sayısı 199 oldı, bütün müddet devamında 39 800 insan yahşı oldı», – dep aytıla haberde.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
