Sentâbrniñ 24-nde Qırımda 84 koronavirus hastası qayd etildi. Bu aqta Qırımnıñ Rusiye yolbaşçısı Sergey Aksenov bildirdi.
Onıñ aytqanına köre, 54 hasta tibbiy yardım içün muracaat etkende belli oldı, 13-ü daa evel qayd etilgen hastalarnen alâqada oldı, 13-ü sağlam ealiniñ skriningi neticesinde belli oldı.
«Umumen Qırımda 4137 yañı koronavirus hastası qayd etildi. 97-si çetelden keldi, 124-ü Rusiye subyetlerinden kelgenler ve olarnen alâqada olğanlar, 3227 tibbiy yardım içün muracaat etkende ve laboratoriyada tasdıqlanğan hastalarnen alâqada olğanı içün qayd etildi, 689 sağlam insanlarnıñ laborator skriningi neticesinde belli oldı», – dep qayd etti Aksenov.
Keçken künü 4143 insannıñ tedqiqi yapıldı. 2635 kişi tüzeldi.
Hatırlatamız, Qırımda sentâbrniñ 23-nde 81 koronavirus hastası qayd etildi.
Rospotrebnadzor, Qırımda koronavirus hastalarınıñ sayısı arta, dep qayd etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
