Keçken künü Qırımda 81 koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov.
«62-si tibbiy yardım içün muracaat etkende belli oldı, 9-ı daa evel hastalanğanlarnen alâqada olğanlar, 9-ı sağlam insanlarnıñ skriningi neticesinde belli oldı, 1 hasta Beyazrusiyeden keldi», – dep aytıla Facebook haberinde.
Yerli akimiyetniñ malümatına köre, umumen Qırımda 3889 yañı koronavirus hastası qayd etildi, 96-sı çetelden keldi, 124-ü qomşu Rusiyeden kelgenler ve olarnen alâqada olğanlar, 658 hasta sağlam insanlarnıñ laborator skriningi neticesinde belli oldı, 2469 insan tüzeldi. Yılnıñ başından Aqyarda 818 insan yañı koronavirus yuqunçına oğradı, 544 kişi yahşı oldı, 22 insan vefat etti.,
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
