İyülniñ 10-unda Qırımda 24 COVID-19 adisesi qayd etildi, bunı Qırımnıñ rusiyeli başı Sergey Aksönov haber etti.
Onıñ aytqanına köre, 24-ten 12 adise - ketirilgen, dörtü epidemiyağa qarşı tedbirler keçirilgende aydın oldı, daa yedisi - adamlar tibbiy yardımğa muracaat etkende qayd etildi, birisi - sağlam şahışlarnıñ skrininginde belli oldı.
"Umumen Qırımda 855 yañı koronavirus infektsiyası qayd etildi. Olardan 53-ü - çetelden ketirildi, 99-ı - Rusiyeden, 616-sı - adamlar tibbiy yardımğa muracaat etkende qayd etildi, 87-si - sağlam şahışlarnıñ skrininginde belli oldı", - yazdı Aksönov Fecebook saifesinde.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
