Tünevin Qırım yarımadasında quru ösümlikler yanğını qayd etildi, dep bildire Rusiye FVN-niñ Qırım idaresiniñ matbuat hızmeti.
İçki (Sovetskiy) rayonınıñ Sarğıl (Luçevoye) köyüniñ çetinde açıq tarlada quru ösümlikler yana edi, dep bildirile.
"Quru ve yelli ava olğanı içün, ateş tez 5 gektarlıq mıntaqanı qapladı. Ösümlik yanğan yer taşlı olğanı icün, mahsus tehnikanı qullanıp olamadılar. Amma ateşniñ daa tarqalmamasını ve vaqtında söndürilmesini becerdiler", - denile beyanatta.
Daa evel Rusiye FVN-niñ Qırım idaresi, iyünniñ başından berli Qırımda 140 yanğın çıqtı, dep bildirgen edi.
Aqyarda Üç Quyu qasabasınıñ rayonında iyülniñ 2-nde lavanda tarlası yandı.
Bundan evel İçki rayonınıñ Mamat Şaqul (Markovo) köyünde boğday tarlası yandı.
Daa evel Kefe civarında orman yanğınını tahminen doquz saat devamında söndürdiler.
Avgustnıñ 11-inde üyleden soñ Üç Qoş deresinde yanğın başlandı. Fevqulade vaziyetler hızmetiniñ (FVH) haber etkenine köre, yanğın uzaq dağlıq yerinde, 45-80 derecelik bir bayır capında başlandı. Ateşniñ söndürmesine, derede 15-20 m/s qadar köterilgen küçlü yel mania ola.
