Oktâbrniñ 8-nde Qırımda 140 koronavirus hastası qayd etildi. Bu aqta Qırımnıñ Rusiye yolbaşçısı Sergey Aksenov bildirdi.
Onıñ aytqanına köre, 140 hastadan 97-si tibbiy yardım içün muracaat etkende qayd etildi, 43-ü daa evel qayd etilgen hastalarnen alâqada oldı.
«Umumen Qırımda 5553 yañı koronavirus hastası qayd etildi. 107-si çetelden keldi, 128-i Rusiye subyektlerinden kelgenler ve olarnen alâqada olğanlar, 4440 hasta tibbiy yardım içün muracaat etkende ve hastalarnen alâqada olğanı içün qayd etildi, 869-ı sağlam insanlarnıñ laborator skriningi neticesinde belli oldı», – dep qayd etti Aksenov.
Keçken künü 5250 insan tedqiq etildi. Bütün müddet devamında 3390 kişi tüzeldi.
Hatırlatamız, oktâbrniñ 7-nde 125 koronavirus hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
