Rusiye kontrolindeki Qırım sağlıq nazirligi bir künde COVID-19 hastalarınıñ sayısı artqanını qayd etmege devam ete – yanvarniñ 24-nde saba 324 yañı hasta qayd etildi, bu bir evelki künden daa çoq ola, dep haber ete müessiseniñ matbuat hızmeti.
Sağlıq nazirligi keçken künü sekiz hasta koronavirus yuqunçından vefat etti, dep bildirdi.
«Umumen 130 137 COVID-19 hastası qayd etildi. Bir künde 185 insan yahşı oldı, bütün müddet devamında 121 282 kişi tüzeldi», – dep aytıla haberde.
Hatırlatamız, Qırım Sağlıq nazirligi 298 yañı COVID-19 hastası ve vefat etken doquz hasta aqqında bildirgen edi.
Yanvarniñ 17-nde Qırımnıñ Rusiye yolbaşçısı Sergey Aksenov, Qırımda «omikron» ştammı qayd etildi, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
