Qırımda koronavirus yuqunçına oğrağan daa üç kişi vefat etti. Böylece, sentâbrniñ 29-ı sabasına vefat etken hastalarnıñ sayısı 62 oldı.
«2362 insan tibbiy közetüv altında buluna, 633-ü dinamik közetüv altında evde qala, 1621 insan hastahanede yata, 109 kişi observatorlarğa alındı», – dep aytıla haberde.
Qırım ve Aqyardaki Rospotrebnadzor idaresi 4474 COVID-19 hastasını qayd etti. 1579 insan Qırımnıñ tibbiy müessiselerinde tedaviylene, 2780 insan tüzelgen soñ yiberildi.
İşğal etilgen Qırımnıñ Rusiye yolbaşçısı Sergey Aksenovnıñ bildirgenine köre, sentâbrniñ 29-nda saba qayd etilgen 87 yañı koronavirus hastası aqqında haber etildi.
Rospotrebnadzor, Qırımda koronavirus hastalarınıñ sayısı arta, dep qayd etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
