Qırımda soñki ayda 48 oquv yurtunda yañı koronavirus hastaları qayd etildi, 100-den çoq talebe ve oca hastalandı. Bu aqta Qırım ve Aqyardaki Rospotrebnadzor idaresiniñ yolbaşçısı Natalya Penkovskaya oktâbrniñ 7-nde operativ ştab toplaşuvında bildirdi.
«Sentâbrniñ 1-nden başlap 48 tasil müessisesinde koronavirus hastaları qayd etildi, 57 hasta oca ve 49 hasta talebe qayd etildi, tek 15-iniñ keskin nefes virus yuqunçı alâmetleri bar edi. Qapalı tasil müessiseleri de bar», – dedi Penkovskaya.
Qırımnıñ Rusiye yolbaşçısı Sergey Aksenov çoq hasta qayd etilgen sınıflar karantinge qapatılmalı, dep qoşmı.
«Amma metkeplerni uzaqtan tasilge keçirmeymiz», – dep qayd etti Aksenov.
Daa evel berilgen malümatqa köre, Qırımda yañı koronavirus hastaları olğan 90 sınıf uzaqtan tasil ala.
Keçken künü Qırımda yañı antirekord qayd etildi – 118 koronavirus hastası.
Umumen Qırımda, yerli akimiyetniñ malümatına köre, 5288 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar. Bütün müddet devamında 3246 insan tüzeldi, 72 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
