Qırım akimiyeti bu yılnıñ soñuna qadar yarımadada qazılıp başlağan tahminen otuz quyudan suv berip yetiştirmeli, dep bildire Rusiye iqtisadiy inkişaf naziriniñ muavini Sergey Nazarov.
«Bu işler Qırım ve Aqyarnıñ suv teminlevi sistemalarına ilâve suv berecek. Qazılğan quyularnıñ suvını Qırım sakinlerine yılnıñ soñuna qadar berip yetiştirmek müim ola», – dep bildire Nazarovnıñ aytqanlarını Rusiye iqtisadiy inkişaf nazirliginiñ matbuat hızmeti cuma künü.
Rusiye memurı yarımadada «Qırımnı yahşı suv teminlevini» teftiş ete.
Nazarov Qırım ve Aqyarda quyular qazılacaq meydançıqlarnı baqtı. Rusiye kontrolindeki Qırım memurları yılnıñ soñuna qadar 20 quyu Qırımda ve daa sekizi Aqyarda qazılacaq, dep bildirdi.
Daa evel haber etilgenine köre, Nazarov Qırımda 2021 senesiniñ başına qadar «keskin suv qıtlığını» yeñmege talap ete.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
