Soñki afta Qırımda koronavirus hastalarınıñ vefat sayısında antirekord qayd etildi, dep bildirdi Qırım ve Aqyardaki Rospotrebnadzor idaresiniñ yolbaşçısı Natalya Penkovskaya.
«Bu afta koronavirus yuqunçından vefat etkenlerniñ sayısına köre lider ola – 53 kişi vefat etti. Dekabr ayında 144 kişi öldi. Oktâbr ayında 75 vefat edi, noyabrde – 155», – dep qayd etti o.
Qırımnıñ baş sanitar ekimi hatırlatqanına köre, hastalarnıñ yardım içün muracaat etmesi eñ sıq sebeplerden biri ola.
Keçken afta Penkovskaya yarımadada koronavirus hastalarınıñ sayısı arta, dep bildirgen edi.
Keçken künü Qırımda 353 koronavirus hastası qayd etildi. Bir künde tüzelgenlerniñ sayısı 264 oldı, pandemiya başlağanından 16 938 kişi tüzeldi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
