Aqmescit civarındaki Mamaq (Stroganovka) köyünde ğayıp olğan üç yaşında Musa Suleymanovnı qıdırmağa devam eteler, biñden çoq kişi oğlançıqnı qıdıra. Bu aqta «Qırım birdemligi» cemaat birleşmesi Qırım.Aqiqatqa bildirdi.
«Gece tahminen 4000-5000 insan bar edi. Kündüz 2000-ge yaqın. Koordinatorlar bergen malümatlar: «Liza Alert» iştirakçilerge nomeralar bere», – dep bildirdi «Qırım birdemligi».
Qıdıruv taqımları içün aş azırlaylar. Bu aqta qırımlı aq qorçalayıcı Lutfiye Zudiyeva Facebookta bildirdi. Onıñ aytqanına köre, insanlar çoq aş ketire.
Coyulğan oğlançıq – cemaat jurnalisti, Aqmescitteki ekinci «Hizb ut-Tahrir davasınıñ» mabüsi Ruslan Suleymanovnıñ oğludır.
Daa evel berilgen malümatqa köre, balanı qıdırmaq içün Rusiye politsiyasınıñ hadimleri, kinologlar, Qırımdaki Rusiye Fevqulâde vaziyetler nazirliginiñ vekilleri ve «Liza Alert» teşkilâtınıñ göñüllileri celp etildi.
Qırım ve Aqyardaki Rusiye Tahqiqat komitetiniñ idaresi üç yaşında Musa Suleymanovnıñ iyülniñ 24-nde Aqmescit civarında Mamaq köyünde ğayıp oluvınen bağlı cinaiy dava açtı. Qırımnıñ Rusiye prokuraturası Rusiye Ceza kodeksiniñ 105-inci maddesiniñ 2-nci qısmınıñ «v» noqtasına istinaden – küçük bala öldürilüvi – cinaiy dava açtı.
