İşğal etilgen Qırımda 25 belediye ve yarımada çağıruv komissiyası teşkil etildi. Bu aqta Qırımnıñ Rusiye tarafından tayin etilgen arbiy komissarı Yevgeniy Maşukov "Moskovskiy komsomolets" neşirine bildirdi.
"İş başlandı. Planlarnı yerine ketirecekmiz. Aprel ayına qadar toplaşuv noqtasından arbiy bölüklerge yollanılacaq bütün taqımlar endi teşkil etildi. Birinci yollanma aprelniñ 15-nde oldı", — dep qayd etti o.
Bundan da ğayrı, Maşukov askerlikke çağıruv yaşını arttırılğanını bildirdi, çünki genç qırımlılar bundan meraqlana.
"27-30 yaşları arasında bu vatandaşlar arbiy hızmetke çağıruv yolu ile arbiy borcunı yerine ketire bileler. Bundan evel bu yaş 27 edi. 27 yaşına kelgen vatandaşlarnıñ çoqusı daa aliy oquv yurtlarında oquy edi ve tahminen 60% bu oquv yurtlarını bitirgen soñ (olar endi 27 yaşından büyük edi) ileride karyerası qurulğanda yüksek vazifelerge tayin etilgende manialar olmasın dep, askerlik hızmetini keçmek istey edi", — dedi o.
Ukryaina prezidentiniñ Qırım Muhtar Cumhuriyeti ve Aqyardaki temsilciligi Qırımda Rusiye Silâlı quvetlerinde hızmet etmege mecbur etilgen Ukrayina vatandaşlarını bu aqta haber etmege çağırdı. Müessisede eminler ki, Qırımda bulunğan Ukrayina vatandaşlarınıñ askerlikke çağırılmamağa ıntıluvlarına baqmadan, Rusiye akimiyeti olarnı cinaiy taqip mehanizmleri vastasınen hızmet etmege mecbur etmege tırışacaq. 520 adise aqqında endi belli, olardan 206-sı 2022 senesi fevralniñ 24-nden soñ qayd etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
